22:02
Unknown
អ្នកលក់កំពុងជ្រើសរើសសាច់ជ្រូកជូនអតិថិជននៅផ្សារមួយនាក្រុងហុងកុង។ Bloomberg
ក្រុងវ៉ាស៊ីនតោនៈ កាលពីថ្ងៃអង្គារ ធនាគារពិភពលោក (WB) បានព្យាករពីកំណើនសេដ្ឋកិច្ចនៅតាមប្រទេសកំពុងអភិវឌ្ឍន៍ ដោយសារការធ្លាក់ចុះតម្លៃប្រេង បើទោះជាមានការធ្លាក់ចុះបន្តិចបន្តួចនៃសេដ្ឋកិច្ចចិនដែលជាក្បាលម៉ាស៊ីនក្នុងការជំរុញសេដ្ឋកិច្ចសកលក្តី។
កំណើន ផ.ស.ស ដែលជាកត្តាវាស់វែងធំមួយនៃទិន្នផលទំនិញ និងសេវាកម្មរបស់ប្រទេសមួយ នៅតាមប្រទេសកំពុងអភិវឌ្ឍន៍អាចសម្រេចបានកំណើនប្រចាំឆ្នាំ៤,៨ភាគរយនៅឆ្នាំ២០១៥ ពោលគឺកើនឡើងធៀបនឹងកំណើន៤,៤ភាគរយកាលពីឆ្នាំមុន និងកើនឡើងដល់៥,៣ភាគរយនៅឆ្នាំ២០១៦។ នេះបើតាមការព្យាករចុងក្រោយរបស់ធនាគារមួយនេះ។
ធនាគារពិភពលោកបានឲ្យដឹងក្នុងសេចក្តីថ្លែងការណ៍មួយថា៖ «បន្ទាប់ពីសម្រេចបានកំណើនសេដ្ឋកិច្ចមិនសូវល្អមួយឆ្នាំទៀតនៅឆ្នាំ ២០១៤ ប្រទេសកំពុងអភិវឌ្ឍន៍គួរតែអាចសម្រេចបានកំណើនសេដ្ឋកិច្ចនៅឆ្នាំនេះ មួយផ្នែកដោយសារតម្លៃប្រេងទាប កំណើនសេដ្ឋកិច្ចអាមេរិកខ្ពស់ និងអត្រាការប្រាក់ពិភពលោកនៅតែមានកម្រិតទាបជាបន្ត និងការវិវឌ្ឍនៅតាមប្រទេសធំៗ ដែលមានសេដ្ឋកិច្ចកំពុងអភិវឌ្ឍន៍ខ្លាំងមួយចំនួន។
ការធ្វើបច្ចុប្បន្នភាពនៃរបាយការណ៍ស្តីពីចក្ខុវិស័យសេដ្ឋកិច្ចសកលរបស់ធនាគារនេះ បានបង្ហាញថា សន្ទុះសេដ្ឋកិច្ចនៅតាមប្រទេសកំពុងអភិវឌ្ឍន៍អាចនឹងជំរុញកំណើនសេដ្ឋកិច្ចសកលឲ្យកើនឡើងកាន់តែខ្ពស់គឺដល់៣ភាគរយនៅឆ្នាំ២០១៥ ធៀបនឹងកំណើន២,៦ភាគរយនៅឆ្នាំ២០១៤ បើទោះជាមានបញ្ហាសេដ្ឋកិច្ចដ៏រ៉ាំរ៉ៃនៅតំបន់ប្រើប្រាស់ប្រាក់អឺរ៉ូ និងជប៉ុនក្តី។
ចំពោះប្រទេសចិន ដែលជាប្រទេសឈានមុខគេក្នុងចំណោមប្រទេសដែលមានសេដ្ឋកិច្ចកំពុងអភិវឌ្ឍន៍ខ្លាំងនោះ ការធ្វើកំណែទម្រង់រចនាសម្ព័ន្ធ ការឈប់ប្រើប្រាស់សន្សឹមៗនូវវិធានការជំរុញសារពើពន្ធ និងវិធានការរឹតត្បិតជាបន្តដើម្បីកាត់បន្ថយកំណើនឥណទាន អាចនឹងជំរុញឲ្យកំណើនសេដ្ឋកិច្ចរបស់ប្រទេសនេះធ្លាក់ចុះមកនៅត្រឹម ៦,៩ ភាគរយនៅឆ្នាំ ២០១៧ ធៀបនឹងកំណើន ៧,៤ ភាគរយនៅឆ្នាំ ២០១៤»។ នេះបើយោងតាមធនាគារដែលប្រយុទ្ធប្រឆាំងនឹងភាពក្រីក្រមួយនេះ។
កំណើន ផ.ស.ស របស់ប្រទេសដែលមានសេដ្ឋកិច្ចធំជាងគេទីពីរក្នុងពិភពលោកមួយនេះ អាចនឹងសម្រេចបានកំណើនត្រឹមតែ៧,១ភាគរយនៅឆ្នាំនេះ និងអាចធ្លាក់ចុះបន្តិចមកនៅត្រឹម៧ភាគរយនៅឆ្នាំ២០១៦។
ប្រទេសដែលមានសេដ្ឋកិច្ចអភិវឌ្ឍន៍ខ្លាំងមួយទៀតគឺប្រទេសឥណ្ឌា អាចជាប្រទេសមួយក្នុងចំណោមប្រទេសដែលទទួលផលប្រយោជន៍ពីការធ្លាក់ចុះតម្លៃប្រេង ដែលបានធ្លាក់ចុះជិត ៦០ ភាគរយគិតចាប់ពីខែ មិថុនា មក។ មហាអំណាចសេដ្ឋកិច្ចអាស៊ី ដែលជាប្រទេសនាំចូលប្រេងសុទ្ធមួយនេះអាចនឹងសម្រេចបានកំណើន ផ.ស.ស រហូតដល់ ៦,៤ ភាគរយនៅឆ្នាំនេះ ធៀបនឹងកំណើន៥,៦ភាគរយកាលពីឆ្នាំមុន។
ធនាគារពិភពលោកបានឲ្យដឹងទៀតថា តម្លៃប្រេងឆៅទាបក៏អាចជួយដល់ប្រទេសប្រេស៊ីល ឥណ្ឌូនេស៊ី អា្រហ្វិកខាងត្បូង និងប្រទេសតួកគី ក្នុងការប្រយុទ្ធប្រឆាំងនឹងអតិផរណា និងកាត់បន្ថយឱនភាពថវិកាចរន្តរបស់ខ្លួន ដែលជាប្រភពមួយនៃភាពងាយរងគ្រោះចំពោះហានិភ័យសេដ្ឋកិច្ចសកលផងដែរ។
លោក Kaushik Basu ប្រធានសេដ្ឋវិទូប្រចាំធនាគារពិភពលោក និងជាអនុប្រធានជាន់ខ្ពស់បានឲ្យដឹងក្នុងសេចក្តីថ្លែងការណ៍ដដែលនេះថា៖ «អ្វីជាកត្តាចាំបាច់សម្រាប់ប្រទេសទាំងនេះ គឺត្រូវប្រើប្រាស់ឱកាសនេះ ដើម្បីអនុវត្តកំណែទម្រង់សារពើពន្ធ និងរចនាសម្ព័ន្ធ ដែលអាចជំរុញកំណើនសេដ្ឋកិច្ចរយៈពេលវែង និងការអភិវឌ្ឍរួម»។
ទន្ទឹមនឹងនោះដែរ ប្រទេសផលិតប្រេងនានាបានប្រឈមបញ្ហាដោយសារការធ្លាក់ចុះតម្លៃប្រេង។ ប្រទេសរុស្ស៊ី ដែលជាគោលដៅនៃការដាក់ទណ្ឌកម្មសេដ្ឋកិច្ចពីប្រទេសលោកខាងលិចដែរនោះ អាចនឹងប្រឈមការធ្លាក់ចុះសេដ្ឋកិច្ច ២,៩ ភាគរយនៅឆ្នាំនេះ មុនពេលសម្រេចបានកំណើនឡើងវិញនៅឆ្នាំ២០១៦។
លោក Jim Yong Kim ប្រធានធនាគារពិភពលោក បានថ្លែងថា៖ «ក្នុងបរិយាកាសសេដ្ឋកិច្ចមិនប្រាកដប្រជានេះ ប្រទេសកំពុងអភិវឌ្ឍន៍ចាំបាច់ត្រូវប្រើប្រាស់ធនធានរបស់ខ្លួនប្រកបដោយភាពប៉ិនប្រសប់ ដើម្បីទ្រទ្រង់កម្មវិធីសង្គមដោយផ្តោតលើពលរដ្ឋក្រីក្រ និងអនុវត្តកំណែទម្រង់រចនាសម្ព័ន្ធ ដែលវិនិយោគលើធនធានមនុស្ស»៕
------------------------------------------------------------
Source:http://www.postkhmer.com
Posted in: Economies
0 comments:
Post a Comment