20:00
Unknown
Thu, 5 February 2015
ក្រុងបាងកកៈ ក្រុមហ៊ុននាំចេញអង្ករថៃកំពុងព្យាករថា ការនាំចេញអង្ករនៅឆ្នាំនេះអាចមានត្រឹមតែ ១០ លានតោនប៉ុណ្ណោះដែលមូលហេតុចម្បងគឺដោយសារតម្លៃអង្ករថៃខ្ពស់។
លោក Charoen Laotham matas ប្រធានសមាគមនាំចេញអង្ករថៃ ឲ្យដឹងកាលពីថ្ងៃអង្គារថា បរិមាណនាំចេញដែលបានព្យាករនេះមានកម្រិតទាបជាងខ្លាំង ធៀបនឹងការព្យាកររបស់ក្រសួងពាណិជ្ជកម្ម និងក្រសួងកសិកម្មអាមេរិក។
សមាគមនេះរំពឹងថា ការនាំចេញអាចនឹងទទួលបានចំណូលចំនួន ៥,៩៥ ពាន់លានដុល្លារអាមេរិក ឬស្មើនឹង ១៦១ ពាន់លានបាតនៅ ឆ្នាំ២០១៥។
បរិមាណអង្ករចំនួន ១០ លានតោននេះ រួមមាន អង្ករល្អចំនួន ៥ លានតោន អង្ករក្រអូបម្លិះចំនួន ២ លានតោន អង្ករសំរូបចំនួន ២,៧ លានតោន អង្ករដំណើបចំនួន ១០ ម៉ឺនតោន និងអង្ករក្រអូបថៃ ប៉ាធុមថានី ចំនួន ២០ ម៉ឺនតោន។
ក្រសួងកសិកម្មអាមេរិក បានព្យាករនាពេលថ្មីៗនេះពីការនាំចេញអង្ករថៃ ថានឹងមានចំនួន ១១,៣ លានតោន ហើយក្រសួងពាណិជ្ជកម្មថៃ ក៏បានប្រកាសនាពេលថ្មីៗនេះដែរថា ខ្លួនមានសុទិដ្ឋិនិយមស្តីពីការវិលត្រឡប់របស់ប្រទេសថៃ មកគ្រប់គ្រងទីផ្សារអង្ករពិភពលោកវិញ ដោយការនាំចេញមាន ១១ លានតោនក្នុងឆ្នាំនេះ។
ប្រទេសថៃ បាននាំចេញអង្ករចំនួន ១០,៩៦ លានតោនកាលពីឆ្នាំមុន ពោលគឺកើនឡើង ៦៦ ភាគរយធៀបនឹងការនាំចេញនៅ ឆ្នាំ២០១៣។ ទំហំនៃការនាំចេញបានកើនឡើង ២៣ ភាគរយដល់ ៥,៤៣ ពាន់លានដុល្លារ។
លោក Charoen បានថ្លែងថា ឆ្នាំ២០១៥ គឺជាឆ្នាំដែលមានបញ្ហាប្រឈមចំពោះការនាំចេញអង្ករ ដោយបច្ចុប្បន្នអង្ករថៃ មានតម្លៃខ្ពស់បំផុតប្រចាំតំបន់។
ឧទាហរណ៍ តម្លៃអង្ករបាក់ ៥ ភាគរយដឹកដល់កំពង់ផែរបស់វៀតណាម ដែលជាគូប្រជែងសំខាន់មួយរបស់ថៃ មានតម្លៃពី ៣៥០ ទៅ ៣៦០ ដុល្លារក្នុងមួយតោនធៀបនឹងអង្ករថៃ ដែលមានតម្លៃ ៤០៥ ទៅ ៤១០ ដុល្លារក្នុងមួយតោន។
កាលពីឆ្នាំមុន តម្លៃអង្ករថៃមានតម្លៃថោកជាងអង្ករវៀតណាមពី ២០ ទៅ ៣០ ដុល្លារក្នុងមួយតោន។
លោក Charoen បានបន្តឲ្យដឹងថា៖ «នៅឆ្នាំនេះ ប្រទេសថៃ អាចប្រឈមនឹងការប្រកួតប្រជែងខ្លាំង។ ទន្ទឹមនឹងនោះដែរស្តុកអង្ករដ៏ច្រើនសន្ធឹកសន្ធាប់របស់រដ្ឋាភិបាល និងអត្រាប្តូរប្រាក់បរទេសដែលប្រែប្រួលខ្លាំងដោយសារគោលនយោបាយផ្គត់ផ្គង់ថវិកាបន្ថែម (QE) នៅអឺរ៉ុប និងជប៉ុន ទំនងជាបង្កើនសម្ពាធកាន់តែខ្លាំងលើតម្លៃអង្ករថៃ»។
លោកបានបន្តថា៖ «ការធ្លាក់ចុះតម្លៃប្រេងក៏អាចជំរុញឲ្យអតិថិជនដែលមានសក្តានុពលខ្ពស់នៅតំបន់អាហ្វ្រិក ដូចជាប្រទេសនីហ្សេរីយ៉ា ទិញអង្ករតិចជាងមុនផងដែរ»។
ជាងនេះទៀត ស្ថានភាពរាំងស្ងួតកំពុងកាត់បន្ថយទិន្នផលអង្ករក្នុងស្រុក ជាពិសេសទិន្នផលអង្ករនៅរដូវប្រមូលផលលើកទីពីរ។
លោក Chookiat Ophaswongse ប្រធានកិត្តិយសនៃសមាគមនាំចេញអង្ករថៃបានថ្លែងថា ការនាំចេញអង្ករទាបអាចនឹងកើតមាន ជាពិសេសចំពោះអង្ករស និងអង្ករសំរូប ដោយសារអតិថិជនសក្តានុពល អាចនឹងងាកមករកអង្ករដែលមានតម្លៃថោកជាងនេះពីប្រទេសផលិតអង្ករផ្សេងទៀត ដោយសារការធ្លាក់ចុះតម្លៃប្រេង និងកំណើនថ្លៃប្រាក់បាតថៃ។
លោក Vichai Sriprasert ប្រធានកិត្តិយសសមាគមនាំចេញអង្ករថៃម្នាក់ទៀត បានថ្លែងថា អត្រាប្តូរប្រាក់បរទេសនឹងដើរតួនាទីសំខាន់មួយថា តើការនាំចេញអង្ករនឹងមានទំហំប៉ុនណាជាមួយនឹងវិធានការ QE នៅបរទេស ដែលជាបញ្ហាសំខាន់មួយទៀតនោះ?
លោកបានជំរុញឲ្យធនាគារកណ្តាលថៃជួយគ្រប់គ្រងតម្លៃប្រាក់បាត និងរក្សាតម្លៃរូបិយប័ណ្ណនេះឲ្យស្របតាមរូបិយប័ណ្ណរបស់គូប្រជែងផ្សេងទៀតនៅក្នុងតំបន់៕
Posted in: Khmer news
0 comments:
Post a Comment