21:30
Unknown
<
ផ្នត់គំនិតចំពោះការប្រើប្រាស់ឧបករណ៍អេឡិចត្រូនិក (ស្មាតហ្វូន/កុំព្យូទ័រ) អាចមានតៗគ្នាជាយូរមក ដោយអ្នកខ្លះនៅតែបន្តអនុវត្តតាម ហើយខ្លះក៏បានកែប្រែទស្សនៈ និងទម្លាប់ចាស់ៗវិញ ព្រោះជារឿងមិនត្រឹមត្រូវ។ ខាងក្រោមនេះគឺជា ការយល់ខុស ជុំវិញរឿងរ៉ាវពាក់ព័ន្ធបច្ចេកវិទ្យា ៨យ៉ាងដែលអ្នកគួរបញ្ឈប់ការជឿតទៅទៀតហើយ៖
១) កុំព្យូទ័រ Mac មិនឆ្លងមេរោគ?
ដោយសារបច្ចេកវិទ្យាមានការអភិវឌ្ឍ គេជឿថា នៅក្នុងពិភពបច្ចេកវិទ្យានេះ សុវត្ថិភាពប្រព័ន្ធកុំព្យូទ័រមិនអាចរក្សានៅបានជារៀងរហូតនោះទេ ពោលគឺតែងមានជនព្យាយាមបំផ្លាញ ហើយក៏មានជនខិតខំការពារសុវត្ថិភាពពីមេរោគ (virus) និង hackerផងដែរ។ ជាក់ស្ដែង កុំព្យូទ័រ Mac របស់ Apple ដែលពីមុនសាធារណជនតែងយល់ថា មិនចេះឆ្លង virus ប៉ុន្តែពេលនេះ ក៏អាចឆ្លងដូចគ្នានឹងកុំព្យូទ័រដំណើរការដោយ Windows ដែរ គ្រាន់តែ virus នៅលើ Mac មិនច្រើនដូច Windows។ មេរោគដែលវាយប្រហារកុំព្យូទ័រ Mac ភាគច្រើនគឺប្រភេទ Trojan ជាក់ស្ដែងកាលពីឆ្នាំ២០១២ បានអុកឡុកលើ Mac អស់រាប់ពាន់គ្រឿងមកហើយ។
២) ការបើក browser តាមទម្រង់ Private/Incognito គឺអាចរក្សាសុវត្ថិភាពអ្នកពី Hacker?
មានការយល់ខុសថា ការប្រើ “អនាមិក ឬ incognito” និង “ឯកជន ឬ private” គឺនឹងផ្ដល់សុវត្ថិភាពលើបណ្ដាញអ៊ីនធឺណិត។ ប្រសិនបើអ្នកកំពុងប្រើ Incognito Mode នៅលើ Google Chrome ឬ Private browsing នៅលើ Firefox និង Safari តាមធម្មតាគឺមានន័យថាកម្មវិធី browser នឹងមិនចាប់យក history រួមទាំង bookmarks របស់អ្នកមករក្សាទុកនោះទេ។ ប៉ុន្តែវាមិនបានបញ្ចៀស និងការពារអ្នកពី hacker បានឡើយ ប្រសិនបើអ្នកនៅតែបើកចូលទៅកាន់គេហទំព័រដែល hacker បានរាយអន្ទាក់ចាំ។
៣) ការដោតសាកថ្មទូរស័ព្ទចោល គឺបំផ្លាញថ្ម (battery)?
ម្ចាស់ទូរស័ព្ទភាគច្រើនប្រហែលមានទម្លាប់ដោតសាកថ្មទូរស័ព្ទរបស់ខ្លួនចោលពេញមួយយប់ ទោះបីថ្មនោះពេញក្នុងរយៈពេលប៉ុន្មានម៉ោងមុនទៅហើយ។ សកម្មភាពបែបនេះ ត្រូវបានមជ្ឈដ្ឋានមួយចំនួនលើកឡើងថា អាចបណ្ដាលឲ្យថ្មទូរស័ព្ទឆាប់ខូចបាន ប៉ុន្តែការពិតគេមិនមានភស្តុតាងណាមកបញ្ជាក់បាននៅឡើយទេ។ ទូរស័ព្ទស្មាតហ្វូនទំនើបៗជាច្រើនប្រើថ្ម lithium-ion ដែលបង្កប់លក្ខណៈឆ្លាតវៃ នឹងបញ្ឈប់ការទទួលសាកថាមពល នៅពេលថ្មពេញទៅហើយនោះ។
៤) ទំហំមេហ្គាភិចហ្សែល (megapixel = MP) កាន់តែធំ នោះសមត្ថភាពកាមេរ៉ាកាន់តែល្អ?
តើមានអ្វីខុសគ្នារវាងកាមេរ៉ាទំហំ 12MP និង 8MP? គឺមិនសូវមានភាពខុសគ្នាច្រើននោះទេ នៅពេលផ្ដិតរូបចេញមក។ គុណភាពរូបភាពត្រូវបានកំណត់ដោយ តើពន្លឺរូបខ្លាំងកម្រិតណាដែល ឧបករណ៍ sensor អាចចាប់យកបាន។ ជាធម្មតា sensor ធំ គួបផ្សំនឹងភិចហ្សែល (pixel) ធំ និងពន្លឺពេញល្អ ទើបរូបភាពមានគុណភាពខ្ពស់។ វាមិនអាស្រ័យលើទំហំ MP ទាំងស្រុងនោះឡើយ។
៥) កុំទាន់អាលសាកថ្មទូរស័ព្ទ ត្រូវរង់ចាំដល់ជិតអស់ថ្ម?
ផ្នត់គំនិតនេះគឺពេញនិយម ហើយតែងកើតមានចំពោះអ្នកយល់ដឹងខ្លះៗអំពីការប្រើប្រាស់សម្ភារៈអេឡិចត្រូនិក។ តាមពិត គឺមិនមានបញ្ហាអ្វីឡើយ ទោះបីអ្នកដោតសាកថ្មទូរស័ព្ទ នៅមុនពេលទូរស័ព្ទមិនទាន់អស់ថ្មនោះ តែតាមពិតវាបែរជារឿងល្អទៅវិញទេសម្រាប់ថ្ម (battery)។ ជាទូទៅ ថ្មគឺត្រូវបានផលិត និងគណនារួចជាស្រេចនូវអាយុកាល ឬចំនួនដែលអាចសាកថាមពលប្រើប្រាស់ឡើងវិញ (number of charge cycle)។ ដូច្នេះការសាកថាមពលឡើងវិញ (charge cycle) ម្ដង គឺជាការ back up ថាមពលថ្មឱ្យពេញនៅពេលថ្មអស់ថាមពល តិចឬច្រើន (មិនអាស្រ័យអស់ថ្មច្រើនទើបអាចបញ្ចូលបាននោះទេ)។
…
៦) កម្រិត resolution អេក្រង់កាន់តែខ្ពស់ គឺប្រាកដជាស្មាតហ្វូនដែលល្អ?
មានការជជែកគ្នាអំពី resolution អេក្រង់ថា មិនមែនជាចំណុចគោលក្នុងការបែងចែកអេក្រង់ទូរស័ព្ទល្អ ឬយ៉ាងណាឡើយ សម្រាប់បរិបទភ្នែកមនុស្សជាអ្នកមើលផ្ទាល់។ អ្នកជំនាញនិយាយថា ភ្នែករបស់មនុស្សមិនអាចមើល និងកំណត់ដឹងកម្រិតដង់ស៊ីតេភិចហ្សែលអេក្រង់លើសពី ៣០០ភិចហ្សែលនោះឡើយ។ ប៉ុន្មានឆ្នាំចុងក្រោយ ក្រុមហ៊ុនទូរស័ព្ទនាំគ្នាបង្កើនដង់ស៊ីតេភិចហ្សែលព្រោះយល់ថា ដើម្បីមានគុណភាពរឹតតែច្បាស់។
នេះគឺជារឿងត្រឹមត្រូវហើយ ប៉ុន្តែចំពោះភ្នែកមនុស្សគឺអស់ដែនកំណត់ត្រឹម 300ppi ប៉ុណ្ណោះ។ ជាក់ស្ដែង LG បានបង្ហាញអេក្រង់ស្មាតហ្វូន–ប្រភេទ quad-HD ដំបូងនៅលើម៉ូដែលស្មាតហ្វូន G3 ជាមួយ resolution ទំហំ 2560×1440។ គេបានយក G3 ប្រៀបធៀបនឹង Galaxy S5 ដែលមានតែ 1080p ឃើញថា ភ្នែកអ្នកមើលមិនអាចញែកដាច់ថា មួយណាអេក្រង់ qHD មួយណា HD បាននោះឡើយ។ អីចឹងហើយ ទើបក្រុមហ៊ុន Apple តែងយកចិត្តទុកដាក់អភិវឌ្ឍបច្ចេកវិទ្យាពន្លឺ ជាងការមើលធ្ងន់លើដង់ស៊ីតេភិចហ្សែលអេក្រង់ iPhone របស់ខ្លួន។
៧) ការប្រើឆ្នាំងសាក iPad មកសាកលើ iPhone គឺជារឿងមិនត្រឹមត្រូវ?
អ្នកប្រើស្មាតហ្វូនទំនើបៗភាគច្រើនតែងមានទស្សនៈយល់ឃើញតៗគ្នាថា បើប្រើឆ្នាំងសាកទូរស័ព្ទ គឺត្រូវប្រើឆ្នាំងសាកដើម និងឱ្យត្រូវតាមប្រភេទឧបករណ៍ ឧទាហរណ៍ ឆ្នាំងសាក iPhone សម្រាប់ iPhone ហើយឆ្នាំងសាក iPad សម្រាប់ iPad។ ប៉ុន្តែលើកនេះគឺផ្ទុយពីការយល់ឃើញនេះទៅវិញ ដោយនៅលើគេហទំព័រផ្លូវការរបស់ Apple បានចុះផ្សាយថា ដុំសាកថ្ម iPad កម្រិត ១២វ៉ាត់ (12-watt iPad adapter) គឺអាចប្រើសម្រាប់សាកទាំងថ្ម iPhone ក៏បាន iPad ក៏បាន មិនមានប៉ះពាល់អ្វីឡើយ។
៨) អ្នកមិនគួរបិទ (shut down) កុំព្យូទ័ររៀងរាល់ថ្ងៃទេ?
អ្នកប្រើកុំព្យូទ័រជាច្រើនមានជំនឿថា ការបិទ (shut down) កុំព្យូទ័រជារៀងរាល់ថ្ងៃនឹងធ្វើឱ្យកុំព្យូទ័រឆាប់ដល់អាយុកាល (time life) ដែលនឹងឆាប់ខូច។ ដូច្នេះហើយ អ្នកប្រើកុំព្យូទ័រមួយចំនួន បែរជាព្យាយាមបញ្ចៀសពីការ shut down បែរជាប្រើ sleep mode ឬ hibernate វិញ។ គេហទំព័រ Lifehaker គូសបញ្ជាក់ថា ការបិទ (shut down) កុំព្យូទ័រនៅពេលឈប់ប្រើវាជាសកម្មភាពល្អជួយឱ្យកុំព្យូទ័រប្រើប្រាស់បានយូរទៅវិញនោះទេ៕
ប្រែសម្រួល៖ លី ឈៀន
ប្រភព៖ businessinsider
Posted in: computer-techniques
0 comments:
Post a Comment