05:18
Unknown
បោះបង់ការសិក្សាអាយុ ១៦ឆ្នាំ ចាប់ផ្ដើមជំនួញក្លាយ
វាសនាមនុស្សម្នាក់ៗមើលមិនឃើញទេ ហើយក៏មិនអាចកំណត់ទុកជាមុនបានដែរ។ អ្នកខ្លះប្រឹងរៀនអស់ថ្នាក់ បែរជារកការងារធ្វើមិនបាន។ ចំណែកអ្នកខ្លះរៀនមិនបានចប់ចុងចប់ដើម ឬមិនបានរៀនផង បែរក្លាយជាមហាសេដ្ឋីទឹកប្រាក់ពាន់លានដុល្លារ នឹកស្មានមិនដល់។ ប៉ុន្តែទោះជាមានចំណុចខុសគ្នា និងភាពជោគជ័យផ្សេងៗគ្នាបែបនេះក្ដី ចំណុចរួមមួយនៃកំពូលអ្នកមានទាំងនោះ គឺការតស៊ូ។ ជាក់ស្ដែង លោក Richard ដែលជាអ្នកខ្សោយបញ្ញា បានបោះបង់ការសិក្សាតាំងពីអាយុ ១៦ឆ្នាំ តែខំតស៊ូរហូតក្លាយជាមហាសេដ្ឋីម្នាក់លើលោក។
ប្រវត្តិជីវិត
លោក Richard Charles Nicholas Branson កើតនៅថ្ងៃទី១៨ ខែកក្កដា ឆ្នាំ១៩៥០ ក្នុងប្រទេសអង់គ្លេស។ ឪពុករបស់លោកឈ្មោះ Edward James Branson ជាមេធាវីម្នាក់ បានស្លាប់កាលពីថ្ងៃទី១៩ ខែមីនា ឆ្នាំ២០១១។ ចំណែកឯម្ដាយរបស់លោកមានឈ្មោះ Eve Branson មានការងារជាអ្នកបម្រើលើយន្តហោះ។ Richard បានរៀបការសាងជីវិតជាមួយប្រពន្ធឈ្មោះ Joan បង្កើតបានកូនពីរនាក់ជាចំណងដៃ។ ដោយសារមានបញ្ហាសុខភាព Richard បានជួបការលំបាកយ៉ាងខ្លាំងក្នុងការរៀនសូត្រ។ បញ្ហាខ្សោយបញ្ញា ស្ទើរតែធ្វើឲ្យលោកឈប់រៀននៅសាលាសម្រាប់កុមារ Scaitcliffe ទៅហើយ ប៉ុន្តែលោកបានតស៊ូរៀននៅទីនោះរហូតដល់អាយុ ១៣ឆ្នាំ។ ក្រោយមក លោកត្រូវបានគេផ្ទេរឲ្យទៅសិក្សានៅសាលាផ្សេងទៀត។ ទោះយ៉ាងណាការប្ដូរសាលានោះមិនបានធ្វើឲ្យលោកមានការរីកចម្រើនទេ រហូតដល់អាយុ ១៦ឆ្នាំ លោកក៏បានបោះបង់ចោលការសិក្សា។
ចាប់ផ្ដើមបែកគំនិតធ្វើជំនួញ
ក្រោយពីបោះបង់ចោលសាលាទាំងវ័យក្មេង លោក Richard បានចាប់ផ្ដើមគំនិតបង្កើតទស្សនាវដ្តីបែបយុវវ័យមួយ។ ការបោះពុម្ពទស្សនាវដ្ដីនេះ ត្រូវបានធ្វើឡើងដោយសិស្សសាលាដែលលោកជាអ្នកដឹកនាំ និងមានគោលដៅទាញចំណាប់អារម្មណ៍ពីអ្នកអានជាសិស្សសាលាដូចគ្នា។ ដំបូងលោកបានយកថ្លៃក្នុងការផ្សាយពាណិជ្ជកម្មពីក្រុមហ៊ុននានាក្នុងតម្លៃសរុប ៨០០០ដុល្លារ ដើម្បីបោះពុម្ពទស្សនាវដ្ដី ៥០០០០ ច្បាប់ចែកជូនសិស្សសាលាដោយឥតគិតថ្លៃ។
ជំនួញកំពុងដំណើរការ ចាប់យកឱកាសថ្មីបន្ថែមទៀត
ការបោះពុម្ពទស្សនាវដ្ដីនៅតែដំណើរការជាប្រក្រតី ប៉ុន្តែក្ដីស្រមៃមិនដែលមានពាក្យថាចប់ទេ សម្រាប់មនុស្សដែលមិនដេកចាំភ័ព្វវាសនា ដូចជាលោក Richard។ ក្នុងឆ្នាំ ១៩៦៩ លោកបានរស់នៅតំបន់មួយ ដែលពោពេញទៅដោយដូរ្យតន្ត្រី និងការសម្ដែង។ ពេលនោះ Richard បានបែកគំនិតបង្កើតក្រុមហ៊ុនថតសំឡេងមួយឈ្មោះថា “Virgin” ដើម្បីរកប្រាក់ជួយផ្គត់ផ្គង់ដល់ទស្សនាវដ្ដីរបស់ខ្លួន។ ក្រុមហ៊ុននោះបានដំណើរការយឺតៗ ប៉ុន្តែវាល្មមគ្រប់គ្រាន់ជួយឲ្យ Richard ពង្រីកគោលដៅជំនួញ។ លោកបានបើកហាងថតសំឡេងមួយបន្ថែមទៀតនៅផ្លូវ Oxford នាទីក្រុងឡុងដុង។ ដោយមានការជោគជ័យលើអាជីវកម្មហាងថតសំឡេង យុវសិស្សដែលបោះបង់ចោលការសិក្សាទាំងក្មេងវ័យនេះ បានបើកស្ទូឌីយោថតសំឡេងក្នុងឆ្នាំ ១៩៧២។
ចម្រៀងមួយបទ ជួយឲ្យល្បីពេញពិភពលោក
ស្នាដៃថតបទចម្រៀងដំបូងគេរបស់ Richard នៅក្រោមស្លាកសញ្ញាក្រុមហ៊ុន Virgin គឺបទ “Tubular Bells” ច្រៀងដោយ Mike Oldfield ក្នុងឆ្នាំ ១៩៧៣ ដោយមានជំនួយពីក្រុមរបស់លោកRichard។ គ្រាន់តែចេញភ្លាម បទនេះបានអង្រួនទឹកចិត្តអ្នកស្ដាប់យ៉ាងខ្លាំង រហូតឈរលើចំណាត់ថ្នាក់ចក្រភពអង់គ្លេសដល់ទៅ ២៤៧ សប្ដាហ៍។ ដោយភាពជោគជ័យនេះ Richard បានព្រមព្រៀងជាមួយក្រុមតន្ត្រីផ្សេងទៀត ដើម្បីយកបទចម្រៀងមកថតសំឡេងនៅក្រុមហ៊ុន Virgin។ ក្រុមតន្ត្រីធំៗជាច្រើនបានមកថតបទចម្រៀងនៅក្នុងក្រុមហ៊ុនរបស់លោក Richard ដែលធ្វើឲ្យក្រុមហ៊ុនមួយនេះមានវត្តមាននៅក្នុងចំណោមក្រុមហ៊ុនថតបទចម្រៀងកំពូលទាំង ៦ លើលោក។
ពង្រីកជំនួញ តែជួបបរាជ័យ
បើទោះជាជោគជ័យយ៉ាងណាក៏ដោយ Richard មិនបានបញ្ឈប់មហិច្ឆតាត្រឹមនេះទេ លោកបានបន្តពង្រីកក្រុមហ៊ុនថែមជាច្រើនទៀត ដែលក្នុងនោះរួមមាន៖ ក្រុមហ៊ុនដឹកអ្នកដំណើរ Voyager Group ក្នុងឆ្នាំ ១៩៨០, ជើងហោះហើរ Virgin Atlantic ក្នុងឆ្នាំ ១៩៨៤ និងហាងផ្សេងទៀតដែលមានឈ្មោះ Virgin ជាច្រើនកន្លែង។
ប៉ុន្តែវាសនាមនុស្សពិតជាស្មានមិនត្រូវទេ។ នៅក្នុងឆ្នាំ ១៩៩២ ភាគហ៊ុនរបស់ Virgin បានធ្លាក់ចុះត្រដាបត្រដួសមិនអាចទប់ទល់នឹងស្ថានភាពពេលនោះបាន។ ក្រោយមកក្រុមហ៊ុននោះត្រូវបានលក់ទៅឲ្យ THORN EMI ក្នុងតម្លៃ ១ ពាន់លានដុល្លារ។ Richard បានខូចចិត្តយ៉ាងខ្លាំងចំពោះការបាត់បង់នេះ ថែមទាំងបានសម្រក់ទឹកភ្នែកក្រោយចុះកិច្ចសន្យាទៀតផង ប៉ុន្តែលោកនៅតែប្ដេជ្ញាចិត្តធ្វើជំនួញជាមួយតន្ត្រីដដែល។ ក្នុងឆ្នាំ ១៩៩៣ លោក Richard បានបង្កើតប៉ុស្តិ៍វិទ្យុ Virgin ហើយប៉ុន្មានឆ្នាំក្រោយមក លោកក៏បានបើកក្រុមហ៊ុនថតសម្លេងទី ២ ក្នុងឆ្នាំ១៩៩៦។
ក្រោកឈរឡើងវិញ បង្កើតក្រុមហ៊ុនរាប់រយ
បច្ចុប្បន្ននេះត្រកូលក្រុមហ៊ុន Virgin បានកាន់កាប់ក្រុមហ៊ុនផ្សេងទៀតជាង ២០០ នៅក្នុងប្រទេសជាង ៣០ ដែលមានទាំង ចក្រភពអង់គ្លេស សហរដ្ឋអាមេរិក អូស្ត្រាលី កាណាដា ប្រទេសនៅតំបន់អាស៊ី អឺរ៉ុប និងអាហ្វ្រិកខាងត្បូង។ លោក Richard បានពង្រីកជំនួញ រហូតមានទាំងក្រុមហ៊ុនរថភ្លើង ក្រុមហ៊ុនហ្គេមដ៏ប្រណីត ក្រុមហ៊ុនទូរសព្ទ ក្រុមហ៊ុនទេសចរទៅលំហអាកាស Virgin Galactic ទៀតផង។
សម្ដីដ៏មានន័យរបស់លោក Richard
“អ្វីដែលខ្ញុំធ្វើគ្រប់នាទី រាល់ថ្ងៃ ក្នុងជីវិតនេះគឺជាការកម្សាន្ត។ ខ្ញុំមិនដែលមានអារម្មណ៍ថា អ្វីដែលខ្ញុំធ្វើថ្ងៃនេះ គឺជាបន្ទុករបស់ខ្ញុំដែលត្រូវធ្វើទេ”។ ដកស្រង់ចេញពីការសម្ភាសន៍របស់សារព័ត៌មាន The Guardian ថ្ងៃទី ២០ ខែកញ្ញា ឆ្នាំ ២០០៨។
“ទស្សនៈរបស់ខ្ញុំគឺ ពេលមានលុយ ខ្ញុំយកទៅរកស៊ីបន្ថែមទៀត មិនយកវាទុកជាប់ខ្លួនទេឥតប្រយោជន៍ទេ”។ ដកស្រង់ចេញពីការសម្ភាសន៍របស់សារព័ត៌មាន The Sunday Mirror ថ្ងៃទី ១៦ ខែកញ្ញា ឆ្នាំ ២០០០។
“ខ្ញុំកើតមកគ្មានសំណាងមែន តែមិនដែលមានពាក្យថាស្ដាយទេ ហើយក៏មិនផ្ទាល់ប្ដូរទស្សនៈចំពោះជីវិតខ្លួនឯងដែរ។ នេះគឺជាអ្វីដែលធ្វើឲ្យខ្ញុំមានថ្ងៃនេះ”។ ដកស្រង់ចេញពីការសម្ភាសន៍របស់ទស្សនាវដ្ដី Saga ខែកក្កដា ឆ្នាំ ២០០៧។
លោក Richard បានទទួលការផ្ដល់កិត្តិយស និងពានរង្វាន់ពីមេដឹកនាំនានាជាច្រើន ដោយសារគេមានការកោតសរសើរចំពោះភាពជោគជ័យក្នុងជីវិតរបស់លោក។ ក្រៅពីភាពល្បីរន្ទឺក្នុងការធ្វើជំនួញ លោក Richard ក៏បានល្បីឈ្មោះព្រោះជាប់កំណត់ត្រាពិភពលោកជាច្រើនផងដែរ។ បច្ចុប្បន្ននេះលោក Richard ឈរនៅលេខរៀងទី ៣១៦ នៃកំពូលមហាសេដ្ឋីក្នុងលោក ជាមួយទ្រព្យសម្បត្តិ ៥ ពាន់លានដុល្លារ៕
ប្រែសម្រួល៖ គង់ វិសាល
ប្រភព៖ Sabay.com.kh
ប្រភព៖ Sabay.com.kh
Posted in: ជីវិតរស់នៅ និងសុខភាព
0 comments:
Post a Comment